2017-03-02

Пыр на син водзын...


Колян вежонӧ мойвиис ветлыны Чужанінӧ. Поводдя ӧткодь -  тӧвся серпас, помтӧм лым толаяс, лым туктаяс улын узьысь вӧр. Тӧлыд, дерт, мича, но вывті нин кузь миян местаясын.
Урасьӧм 26 лун кежлӧ менӧ да рӧдвужӧс корлісны Пожегса шӧр тшупӧда школаӧ, кӧні нимӧдісны армия, да казьтывлісны менсьым ыджыд вокӧс, Василийӧс. Сьӧлӧмтӧ радуйтісны кизь кодь посньыдик I-ӧд класса велӧдчысьяс асланыс сьылӧмӧн, 3-ӧд классаяс – йӧктӧмӧн, а гырысьджыкъяс сьылісны да лыддисны Васьӧлы сиӧм кывбур. 
Вӧвлӧм велӧдысьяс - класснӧй руководитель Нина Ивановна Сумарокова, тайӧ лунсӧ котыртысь Альбина Петровна Коснырева, ӧнія директор Татьяна Михайловна Третьякова казьтывлісны Василийӧс. Ставсӧ снимайтіс Владимир Игоревич Шомысов, велӧдысь и гижысь. Владимир Игоревич да Елена Александровна Игнатова -  коми кыв сӧвмӧдысьяс. 
Пожегса школалӧн эм аскиалуныс! Ме тӧда, мый Пожег школаысь петавлісны нималана велӧдысьяс, инженеръяс, военнӧйяс, бурдӧдысьяс. И ӧні унаӧн велӧдчӧны престижнӧй ВУЗъясын. Тайӧ петкӧдлӧ, кутшӧм тӧдӧмлунъяс сетӧны школаса велӧдысьяс. 
Менам вок, Шахов Василий Владимирович, во саяс служитіс Москва дорын, нималана Севастопольскӧй бригадаын, сэсся во саяс Югославияын. Эм зэв ошкана командирсяньыс служебнӧй характеристика. Василий вокӧс, миротворец-десантникӧс, наградитӧма ловъя дырйи и кулӧм бӧрас ООН-са медальӧн, пасйӧма памятникъяс вылын карын да Кулӧмдінын.  Вӧвлӧм Югославияын усьӧмлы лоӧ 20 во.


Пуктам дзоридзьяс тэнад гу вылӧ:
Еджыд, лӧзоват, кольквиж и гӧрд.
Мам-бать ас кежсьыс бӧрдӧны, кылӧ,
Налы шог зэв, да кыдзи он бӧрд.
Тэныд овны на эськӧ да овны,
Сӧмын Енмыс тай тайӧс эз сет.
Босьтіс ас дорас вирнад и ловнад,
Муртса кызь арӧс вичмӧдіс тэд.
Пыр на син водзын: нюмдыштӧм чужӧм,
Енэж рӧма берет, збодер стать.
Тэ мӧй та вылӧ, воканӧй, чужин,
Помтӧг бӧрдісны медым мам-бать?
Ыджыд аттьӧ велӧдысьяслы да велӧдчысьяслы тайӧ чукӧртчывлӧмысь да казьтывлӧмысь!
Помас, мунігӧн нин, жугыльмӧдіс юӧр, мый кусӧма олӧмыс Кирпиченко Татьяналӧн, коді дыр висис. Танюша помӧдзыс героически водзсасис висьӧмкӧд. Коли воысь ыджыдджык зонка, пиыс… Воштім мамӧс, велӧдысьӧс да пыдіа мӧвпалысь гижысьӧс. Югыдін да шоныдін муса нывлы.
Василий вокӧс казьтывлігӧн шуисны, мый мортыд ловъя, кор сійӧс казьтывлӧны…

Комментариев нет:

Отправка комментария