2016-11-02

Дневникысь...

Овлӧ сідз, мый некодлы он ков…
Гортад весиг ловъя лов оз виччысь.
Некод бара тэныд нянь да сов
Кияс вылад нюмъяліг оз мыччы.
Жугыльысла гортӧ кӧть эн пыр,
Торъя нора дзуртіг воссьӧ ӧдзӧс.
Боки муысь дыр эг мыччыв ныр,
Ӧні сэсся мынта сыысь водзӧс?
Шойна йӧрын шойччӧ важӧн мам,
Вӧльнӧй светас мырсьӧм сӧмын сюрис.
Воштӧмсьыс тай дойыд оз и ям,
Кымын меным чуктіс сысянь бурыс.
Шог олӧмысь омлявлӧ кыдз пон,
Тшӧтш мый меным ывла вылӧ петны?
Тӧлысь вылӧ, кӧсъян али он,
Кык гӧлӧсӧн ковмас ӧмӧй лӧвтны?
Шонты менӧ, аслам муса поз,
Сьӧлӧмкӧд мед ӧти кывйӧ воны.
Колӧ бара ичӧтдырся моз
Шудаӧн да коланаӧн лоны!

Комментариев нет:

Отправка комментария