2017-03-18

Ӧти лунӧн...

Керыштісны черӧн унзіль кыддзӧс,
Тюрӧбтӧма зараваӧн синва...
Виччысьтӧмла пуыс нора бӧрддзис,
Коньӧрӧйлы дойыс пыдӧ инмӧ.

Помтӧм тӧлын Енмыс сійӧс видзис -
Эз чег, ни эз кынмавлыны вужъяс.
Тулыс воӧм кыддзыд эськӧ аддзис,
Сӧмын рӧкысь пышйыны мӧй кужас?

Чера-пурта везйӧдлӧмысь дойӧн
Сулыштас да муӧ сэсся усяс.
Шогавны оз кужны йӧз моз найӧ,
Бӧрдны нэм чӧж явӧн либӧ гусьӧн.

Ӧти лунӧн дыр-ӧ кутам овны?
Оз кӧ велӧд важыс, да и выльыс…
Петкӧдлам, мый Енмысь кутім повны,
Но и тайӧ, тӧдам, абу збыль на…



2017-03-02

Пыр на син водзын...


Колян вежонӧ мойвиис ветлыны Чужанінӧ. Поводдя ӧткодь -  тӧвся серпас, помтӧм лым толаяс, лым туктаяс улын узьысь вӧр. Тӧлыд, дерт, мича, но вывті нин кузь миян местаясын.
Урасьӧм 26 лун кежлӧ менӧ да рӧдвужӧс корлісны Пожегса шӧр тшупӧда школаӧ, кӧні нимӧдісны армия, да казьтывлісны менсьым ыджыд вокӧс, Василийӧс. Сьӧлӧмтӧ радуйтісны кизь кодь посньыдик I-ӧд класса велӧдчысьяс асланыс сьылӧмӧн, 3-ӧд классаяс – йӧктӧмӧн, а гырысьджыкъяс сьылісны да лыддисны Васьӧлы сиӧм кывбур. 
Вӧвлӧм велӧдысьяс - класснӧй руководитель Нина Ивановна Сумарокова, тайӧ лунсӧ котыртысь Альбина Петровна Коснырева, ӧнія директор Татьяна Михайловна Третьякова казьтывлісны Василийӧс. Ставсӧ снимайтіс Владимир Игоревич Шомысов, велӧдысь и гижысь. Владимир Игоревич да Елена Александровна Игнатова -  коми кыв сӧвмӧдысьяс. 
Пожегса школалӧн эм аскиалуныс! Ме тӧда, мый Пожег школаысь петавлісны нималана велӧдысьяс, инженеръяс, военнӧйяс, бурдӧдысьяс. И ӧні унаӧн велӧдчӧны престижнӧй ВУЗъясын. Тайӧ петкӧдлӧ, кутшӧм тӧдӧмлунъяс сетӧны школаса велӧдысьяс. 
Менам вок, Шахов Василий Владимирович, во саяс служитіс Москва дорын, нималана Севастопольскӧй бригадаын, сэсся во саяс Югославияын. Эм зэв ошкана командирсяньыс служебнӧй характеристика. Василий вокӧс, миротворец-десантникӧс, наградитӧма ловъя дырйи и кулӧм бӧрас ООН-са медальӧн, пасйӧма памятникъяс вылын карын да Кулӧмдінын.  Вӧвлӧм Югославияын усьӧмлы лоӧ 20 во.


Пуктам дзоридзьяс тэнад гу вылӧ:
Еджыд, лӧзоват, кольквиж и гӧрд.
Мам-бать ас кежсьыс бӧрдӧны, кылӧ,
Налы шог зэв, да кыдзи он бӧрд.
Тэныд овны на эськӧ да овны,
Сӧмын Енмыс тай тайӧс эз сет.
Босьтіс ас дорас вирнад и ловнад,
Муртса кызь арӧс вичмӧдіс тэд.
Пыр на син водзын: нюмдыштӧм чужӧм,
Енэж рӧма берет, збодер стать.
Тэ мӧй та вылӧ, воканӧй, чужин,
Помтӧг бӧрдісны медым мам-бать?
Ыджыд аттьӧ велӧдысьяслы да велӧдчысьяслы тайӧ чукӧртчывлӧмысь да казьтывлӧмысь!
Помас, мунігӧн нин, жугыльмӧдіс юӧр, мый кусӧма олӧмыс Кирпиченко Татьяналӧн, коді дыр висис. Танюша помӧдзыс героически водзсасис висьӧмкӧд. Коли воысь ыджыдджык зонка, пиыс… Воштім мамӧс, велӧдысьӧс да пыдіа мӧвпалысь гижысьӧс. Югыдін да шоныдін муса нывлы.
Василий вокӧс казьтывлігӧн шуисны, мый мортыд ловъя, кор сійӧс казьтывлӧны…

2016-11-02

Дневникысь...

Овлӧ сідз, мый некодлы он ков…
Гортад весиг ловъя лов оз виччысь.
Некод бара тэныд нянь да сов
Кияс вылад нюмъяліг оз мыччы.
Жугыльысла гортӧ кӧть эн пыр,
Торъя нора дзуртіг воссьӧ ӧдзӧс.
Боки муысь дыр эг мыччыв ныр,
Ӧні сэсся мынта сыысь водзӧс?
Шойна йӧрын шойччӧ важӧн мам,
Вӧльнӧй светас мырсьӧм сӧмын сюрис.
Воштӧмсьыс тай дойыд оз и ям,
Кымын меным чуктіс сысянь бурыс.
Шог олӧмысь омлявлӧ кыдз пон,
Тшӧтш мый меным ывла вылӧ петны?
Тӧлысь вылӧ, кӧсъян али он,
Кык гӧлӧсӧн ковмас ӧмӧй лӧвтны?
Шонты менӧ, аслам муса поз,
Сьӧлӧмкӧд мед ӧти кывйӧ воны.
Колӧ бара ичӧтдырся моз
Шудаӧн да коланаӧн лоны!

2016-07-25

Бӧрӧ-водзнад гортад он нин шонав,
Эм на кӧть и сэні рӧд да вуж.
Ӧні морттӧ сиктад он нин томнав,
Вӧльнӧй сійӧ – кытӧн кӧть эз чуж.
Уджач мортыд сиктад, дерт жӧ, колӧ,
Кисьтны кокньыд, кыпӧдны зэв дыр.
Киыд вӧчӧ, синмыд кӧть и полӧ,
Зільыдлӧн век пызан вылыс тыр.
Сиктса олӧм, кутам лача, оз быр,
Но а чинӧ  нинӧмтор он кер.
Коми муным грезднас немыс озыр,
Россиялӧн сиктыд – подув кер.





2016-02-19

Туйвизь

Пипу корйӧй, дугдывтӧг тай шпорӧдчан,
Абу быттьӧ некӧн тӧв ни ру,
Кадысь водз кӧ ньӧрйысь-вожйысь орӧдчан,
Муысь кындзи туйвизьыд оз ну.
Кодысь-мыйысь, корйӧй, полан-гажтӧмтчан?
Тэкӧд тӧвру, шонді, гожся зэр,
Мыссьыштан и косьтысян и гожйӧдчан…
Водзӧ мичмӧд вӧр-ваыслысь сер!
Овлӧ, кор моз ачым тадзи нетшкыся,
Бӧрйӧм туйӧд ясыда ог сын.
Бордъястӧм, а вывлань эськӧ кышася,
Судзсьӧд меным, олӧм, ассьыд вын. 

2016-02-08

Эжва, бадьяс, лыа...

Эжва, бадьяс, лыа,
Пила сорса вӧртас,
Ӧмидз рӧма кыа
Мичӧн лолӧс тыртас.
Муса катшасинъяс,
Горадзульыс лыдтӧм,
Гажӧдӧны синъяс,
Колльӧдӧны быттьӧ.
Ордым сиктӧ нуӧ,
Ыркалыштӧ сынӧд.
Рытъя руыс суӧ,
А ме сына паныд.
Чужан сиктӧ вола
Аслам челядьдырӧ,
Нэм чӧж меным колан,
Помтӧг гажӧй бырӧ!

2016-02-06

Сьӧм

Сиктын, видзӧдіг сериалъяс, казялан, медшӧр геройыс – бизнесмен ли олигарх. Уджалысь мортыд киноын улі тшупӧдын. Со ныв тӧдмасьӧ олигархкӧд, и водзӧ олӧмыс петкӧдчӧ райын кодь. Водзын мойдъясын Иван -Царевичьяскӧд нывъяс ӧтласьлісны. 
Ӧтияслы тырмӧ сьӧм ӧти удждонсянь мӧдӧдз. А пельпомъяс вылын кӧ кредит да ипотека вештысьӧм? Комияслӧн эм шусьӧг: «Мый ыджда шебрас, сійӧн и шебрасян». А вермытӧмъяс, пенсия босьтысьяс, ӧтка мамъяс да уна челядя семьяяс? Федеральнӧй да Республикаса социальнӧй программаяс серти канму отсалӧ, но ставыс ӧд и ӧдйӧ донсялӧ – сёян-юан, кӧм-паськӧм.
Мӧдъяс сьӧм кузя олӧны судзсяна. Налӧн мӧвпъясыс мӧдпӧлӧсджыкӧсь. Ньӧбӧны уна жыръя патераяс, бур машинаяс, шойччӧны суйӧрсайса курортъясын. Кыдзи висьталӧ Д.А.Медведев, челядьлы кӧ озыръяс сьӧмсӧ чуктӧдыштӧны на, пӧрысьяслы пӧшти оз, быттьӧ асьныс оз пӧрысьмыны. Ӧні законыс на дор. Сямныс кӧ эм, кыдз роч шусьӧгын «Мича овны он ӧлӧд».
Но сьӧм пӧртӧ синъяссӧ уна мукӧд пыдди пуктана йӧзлысь да веськӧдлысьяслысь. Озырмӧдчӧмыс бурджык мый мича нимсьыныс? Со Кулӧмдін районын бура веськӧдліс М.К.Игнатов, бура уджаліс, газетысь аддзывлан, а ӧні заслужитӧм шойччӧм бӧрын нимӧдӧ да гижӧ война кадсянь ӧніӧдз став бур уджалысь йӧз йывсьыс. Пӧра нин чужан Помӧсдінын либӧ Кулӧмдінын сетны сылысь ним уличалы.
Шензьӧдана, но «Российская газета» гижӧ, мый взятка сэтшӧм ёна паськалӧма велӧданінъясын, бурдӧданінъясын, ГИБДД-ын. Йӧзлӧн бырӧ эскӧм. Озыръяслӧн вывтіасьӧм вӧсна сырбор мунӧ Молдавияын, сэтшӧм вежӧртасыс вӧлі майдан пансигӧн. Комиын стӧч шусьӧг – «Этшаӧн кӧ он пӧт, унанад он нин».

Бурторйыс уна олӧмын, но та йылысь мӧдысь…